II. PAG-UUSAP PARA SA MGA BAGONG POLISIYANG PAMBANSA AT LOKAL
176. Hindi lamang may mga panalo at natalo sa pagitan ng mga bansa, kundi sa mismong mga mahihirap na bansa. Kaya kinakailangang matukoy ang iba't ibang pananagutan. Hindi na simpleng matutugunan lamang ang mga usaping kaugnyan sa kapaligiran at pang-ekonomyang pag-unlad sa pananaw ng pagkakaiba-iba ng pagitan ng mga bansa; nananawagan din sila ng mas malawak na atensyon sa mga patakaran sa antas pambansa at lokal.
177. Kung isasaalang-alang ang totoong potensyal upang maling magamit ang kakayahan ng tao, hindi na mapagsasawalang bahala ng mga indibidwal na estado ang kanilang pananagutan sa pagpaplano, koordinasyon, pangangasiwa at pagpapatupad sa loob ng kani-kanilang mga hangganan. Paano mapaplano at papoprotektahan ng isang lipunan ang kinabukasan nito sa gitna ng patuloy na pagbubuo ng mga inobasyong pangteknolohiya? Isang mapanghahawakang pinagmumulan ng pangangasiwa at koordinasyon ay ang batas, na siyang naglatag ng mga patakaran para sa katanggap-tanggap na gawi na hinggil sa kabutihang panlahat. Ang mga limitasyong dapat ipataw ng isang malusog, matanda na at malayang lipunan ay yaong may kaugnayan sa pag-intindi sa hinaharap at seguridad, kagawiang pinatakaran, napapanahong pagpapatupad, ang pagwawaksi sa katiwalian, epektibong mga tugon sa mga di kanais-nais na di inaasahang epekto ng mga proseso ng produksyon, at angkop na pakikialam kung saan may sangkot nang mga potensyal o di tiyak na panganib. May isang lumalagong batas na humaharap sa pagbabawas ng polusyon sa pamamagitan ng gawaing pangkalakalan. Ngunit hindi umiiral ang mga balangkas pampulitika at institusyonal upang maiwasan lamang ang mga masamang nakagawian, ngunit upang itaguyod na rin ang mga pinakamahuhusay na kagawian, upang pasiglahin ang pagkamalikhain sa paghahanap ng mga bagong solusyon at upang tumulong sa insiyatiba ng mga indibidwal o pangkat.
178. Nahihimok na magsagawa ng pangmabilisang paglago ang pulitikang nag-iisip ng agarang resulta, na sinusuportahan ng mga sektor ng tagakonsumo sa populasyon. Bilang tugon sa interes na panghalalan, nag-aatubili ang mga pamahalaan na mabalisa ang publiko ng mga hakbanging makaaapekto sa antas ng pagkonsumo o magkaroon ng panganib para sa dayuhang pamumunuhunan. Inaantala ng mahinang pagtingin sa kapangyarihang pampulitika ang pagsama ng masinop na dyendang pangkapaligiran sa loob ng pangkalahatang adyenda ng mga pamahalaan. Kaya nakakaligtaan nating "mas masaklaw ang panahon kaysa espasyo", [130] na tayo'y mas laging epektibo kapag bumubuo tayo ng prosesp kaysa tanganan ang mga panunungkulan sa kapangyarihan. Nahahayag ang totoong kasanayang pambayan kapag, sa mga panahon ng kahirapan, itinataguyod natin ang mga dakilang prinsipyo at mag-iisip ng pangmatagalang pangkalahatang kagalingan. Hindi ito nakikitang madali ng mga kapangyarihang pampulitika sa gawain ng pagbubuo ng bansa.
179. Sa ilang pook, isinusulong ang mga kooperatiba upang samantalahin ang mga nababagong pinagkukunan ng enerhiya upang tiyakin ang lokal na sariling kasapatan at maging ang pagbebenta ng labis na enerhiya. Ang simpleng halimbawang ito'y nagpapakitang, habang pinatutunayan ng umiiral na kaayusan ang kawalan nito ng kapangyarihang tindigan ang pananagutan nito, may magagawang tunay na kakaiba ang mga lokal na indibidwal at mga pangkat. Naihahasik nila ang mas malawak na kahulugan ng pananagutan, matinding kahulugan ng bayanihan, kahandaang maprotektahan ang kapwa, diwa ng pagkamalikhain at malalim na pag-ibig sa tinubuang lupa. Iniisip din nila kung anong kanilang maipapamana sa kanilang mga anak at mga apo. Ang mga mabubuting kaugaliang ito'y malalim na nakaugat sa mga katutubo. Dahil ang pagpapatupad ng batas ay paminsan-minsang hindi angkop dahil sa katiwalian, dapat igiit ang pagpwersa ng publiko upang maisagawa ang mapagpasyang aksyong pampulitika. Ang lipunan, sa pamamagitan ng mga samahang di-pampamahalaan (NGOs) at mga pangkat tagapamagitan, ay dapat maggiit sa mga gobyerno na isulong ang mas mahigpit na regulasyon, pamamaraan at mga kontrol. Hangga't hindi nakokontrol ng mamamayan ang kapangyarihang pampulitika - pambansa, pangrehiyon at pambayan - di magiging posible ang pagkontrol ng pinsala sa kapaligiran. Mas epektibo rin ang mga lokal na batas, kung may mga kasunduang umiiral sa pagitan ng mga kalapit na pamayanang sumusuporta sa parehong mga patakarang pangkapaligiran.
180. Walang mga magkakatulad na resipe, dahil ang bawat bansa o rehiyon ay may sariling mga problema at mga limitasyon. Totoo rin na ang realismong pampulitika ay maaaring manawagan ng transisyunal na mga hakbangin at mga teknolohiya, basta't kasama nito ang unti-unting pagbabalangkas at pagtanggap ng mga umiiral na obligasyon. Kasabay nito, sa pambansa at lokal na antas, kayrami pang dapat gawin, tulad ng pagtataguyod ng mga pamamaraan ng pagtitipid ng enerhiya. Kasama rito ang pagpabor sa anyo ng produksyong pang-industriya na may maksimum na kahusayan ng enerhiya at ang maliitan nang paggamit ng mga hilaw na materyales, inaalis sa pamilihan ang mga produktong hindi gaanong mahusay sa enerhiya o mas nakakapagparumi, pagpapabuti ng sistema ng transportasyon, at paghihikayat ng pagtatayo at pagkukumpuni ng mga gusali na may layuning bawasan ang pagkonsumo ng mga ito ng enerhiya at ang antas ng polusyon. Ang mga pampulitikang gawain sa lokal na antas ay maaari ding akayin tungo sa pagbabago ng pagkonsumo, pagbubuo ng ekonomya ng pagtatapon ng basura at pagreresiklo, pagprotekta ng mga tiyak na espésye at pagpaplano ng isang samutsaring agrikultura at ang pagpapalit-palit ng mga pananim. Ang agrikultura sa mas mahihirap na rehiyon ay maaaring mapabuti sa pamamagitan ng pamumuhunan sa imparstrukturang pangnayon, isang mas mahusay na samahan ng mga lokal o pambansang pamilihan, mga sistema ng patubig, at ang pagbubuo ng mga pamamaraan ng sustenableng agrikultura. Maaaring humikayat ng mga bagong anyo ng kooperasyon at samahang pampamayanan upang maipagtanggol ang interes ng maliliit na manlilikha at mapangalagaan ang mga lokal na ekosistema mula sa pagkawasak. Tunay nga, kayrami pang magagawa!
Itutuloy...
Walang komento:
Mag-post ng isang Komento